يااااااااااااه
لما الليل بيشد ضلامه
من جوف نفسه
وأبحث عني في قلب العتمة
واقعد أفتش..أفتش
كل زوايا الغربة الكاتمة ....
علي باب قلبي
مالقاش قلبي ...!!
لأن القلب في لحظة رعشة
ولحظة خوف
صبح مخطوف ....
فجأة القيني بعد ما اتعب
مرمي في حضنك رغم بعادك
حوالين قلبك ...
زى المحرم ألف وأطوف ...
واغزل من أطرافك روحي
والعن خوفي ............!
وأرجم أبو إبليس الغربة
وأشرب ريقك زمزم صافي
يبقى في ريقك بلسم شافي
وأفك حِرَامي بمليون بوسة
تمطر فوق الخد الدافي
وأغزل ليلي بأجمل فجر .....
يبقى الأمل الباقي في فجري
أني أشقشق شمس وأشوفك
وأزرع قلبي في قلب كفوفك
ينبض ضي يبدد خوفك
عايز أغير ريقي المر بشهد حنانك
وارجع أحلي بلهفة شوقك........
نفسي الملم كل الباقي في شنطة سفري
وأرجع طفل بيحبي في عشقك
وأنفض هم الغربة في حجرك
وأشهق منك
يبقى النفس الخارج عطرك
يملى ضلوعك ويا ضلوعي
وأرمي بخوفي في مركب خوفك
وفوق شباكك المتوراب
من اشواقي
أحني كفوفك
وأقعد جنبك
لأ مش جنبك
تقعدي فيا وأقعد فيكي
أبقى النبض اللي بيحيكي
وتبقي القلب اللي بيحيني
تبقي ملامحك جوه ملامحي
ماليه جبيني
ياااااااه
حتى النفس الخارج منك
بيكلفت روحي البردانة..
بيدفني
شوفي الشوق الطالل مني
حسي حنيني
أخمدي ثورة بعدك عني
ضمي الضي
وابقي النني في لمعة عيني
خايف اقولك أنتي القبلة
وأن غرامك أصبح ديني
ولما اطاوع انا شياطيني
القي ملامحك زي ملاك
وقت الكفر قوام يهيدني
أنتي أكيد مخلوقة من شوقي
مش من مادة تشابه طيني ..........
بس دخلتي في قلب دمايا
من جوايا
جوه حشايا
بقيتي في دمي
زي كرات الدم الحمرا
في نبض وريدي
وبقيتي مني
حتى في لحظة خوفك مني
بترعش ايدي
ولما بسلم نفسي لعينك
وأعيش تايه مع حكاياتك
كل ما تخلص الحدوتة
اقولك عيدي
عيدي وزيدي
خلي النبض في قلبي معاني
يبدر ورد في قلب وريدي
وأحضن كفك
وأبوس كفك
اصل البوسة في كفك دنيا
لسه عايشها لحد الساعة
لسة شقاوة رعشة كفك
وقت البوسة
راسمه في قلبي الف مساحة
وكل مساحة
مليون وردة مخضرة ساحة
بكل بصراحة
بلقى في قربك رغم فراقك
كل الراحة
وأغزل من اطرافك روحي